Zaxarova Ermənistana qarşı "hibrid müharibə" iddialarına münasibət bildirib.
Stopnarkotik.az bildirir ki, Rusiya Xarici İşlər Nazirliyinin sözçüsü Mariya Zaxarovanın açıqlamasına görə, Ermənistana qarşı "hibrid müharibə" iddiaları ölkədə Rusiya ilə daha sıx əlaqələrin tərəfdarı olanların təqib olunması fonunda irəli sürülür.
"Bu yanaşma bizə yaddır. Biz həmişə istənilən xalqın suveren seçiminə hörmət etmişik və hörmət etməyə davam edəcəyik. Eyni zamanda, qeyd etməmək mümkün deyil ki, Ermənistana qarşı "hibrid müharibə" iddiaları respublikada ölkəmizlə daha sıx əlaqələrin tərəfdarı olanlara qarşı təqib fonunda irəli sürülür. Bu, son illərdə digər ölkələrdə, məsələn, Moldovada sınaqdan keçirilmiş bir nümunəyə uyğun gəlir", deyə Zaxarova parlament seçkilərindən əvvəl Ermənistan rəsmiləri və ekspertlərinin İrəvana qarşı aparılan iddia edilən "hibrid müharibələr" barədə açıqlamalarına münasibət bildirərkən bildirib.
"Erməni həmkarlarımızın potensial narahatlıqlarını həm parlament kanalları, həm də müvafiq qurumlar arasında təklif etdiyimiz məsləhətləşmələr vasitəsilə, o cümlədən zəruri hallarda Rusiya-Ermənistan münasibətlərini əhatə edən informasiya mühitini düzəltmək məqsədilə müzakirə etməyə hazırıq", deyən Zaxarova xatırladıb ki, Amerika hərbi nəzəriyyəçiləri "hibrid müharibələr" anlayışını ortaya atıblar və dərhal onu praktikada fəal şəkildə tətbiq etməyə başlayıblar.
"Bu yaxınlarda Ermənistanın qonşusu olan Gürcüstanda kollektiv Qərb ölkələri bir daha bütün "hibrid cizgiləri" ilə özlərini göstərdilər: onlar daxili siyasi proseslərə kobudcasına müdaxilə etdilər, Maydan əhval-ruhiyyəsini alovlandırdılar, Tiflisi inkişaf yolunu seçmək azadlığından məhrum etdilər və açıq siyasi şantajla məşğul olaraq, onu onsuz da xəyali Avropa perspektivlərindən məhrum etməklə hədələdilər", deyə Zaxarova qeyd edib.
Rusiya XİN sözçüsü vurğulayıb ki, Rusiya həmişə Ermənistan üçün etibarlı müttəfiq olub və qalır.
"Moskva qardaş xalqına kömək etməyə həmişə hazırdır. Son nümunələrə 2024-cü ilin iyun ayında ölkənin şimalında daşqın nəticəsində zədələnmiş dəmir yolu xətlərinin cəmi bir neçə həftə ərzində bərpası daxildir. Bu ilin noyabr ayında ölkəmizdən Ermənistana buğda daşınması Azərbaycan və Gürcüstandan keçən yeni açılmış dəmir yolu marşrutu ilə ən qısa müddətdə təşkil edilib. İlk daşınma 6 noyabr gecəsi çatıb", deyə o qeyd edib.
Zaxarovanın sözlərinə görə, buğda tədarükü əsasən regional əlaqələrin açılması üzrə üçtərəfli işçi qrupu çərçivəsində əvvəllər görülən səylər və Rusiya, Ermənistan və Azərbaycan liderləri arasında 2020-2022-ci illərdə əldə edilən razılaşmalar sayəsində mümkün olub.
"Yuxarıda adı çəkilən Cənubi Qafqaz respublikaları arasında münasibətlərin normallaşdırılmasında iştirak edərkən Rusiya daim onların suveren milli maraqlarını rəhbər tutub. Lakin Qərbin vasitəçilik səyləri hələ də zamanın sınağından keçməyib", deyə diplomat bildirib.
P.S. Zaxarova Rusiyanın Cənubi Qafqaz respublikaları arasında münasibətlərin normallaşdırılmasında iştirak edərkən, guya daim onların, yəni Azərbaycanla Ermənistanın suveren milli maraqlarını rəhbər tutduğunu, Qərbin vasitəçilik səylərinin zamanın sınağından keçmədiyini səsləndirərkən, böyük ehtimalla Bakı ilə İrəvan arasında daim gərginliyin Moskva tərəfindən xüsusən cani-dildən körükləndiyini nəzərdə tutub. Görünür, “oda yağ tökmək”, şakərindən vaz keçə bilməyən Moskva “əyri güzgülər krallığı”nda yaşayır və reallığı özünəməxsus şəkildə təhrif etməkdən əl çəkə bilmir.
Stopnarkotik.az