Nüfuzlu ABŞ Müharibə Araşdırmaları İnstitutu (ISW) hesab edir ki, Rusiya iqtisadiyyatı 2025-ci ildə Ukraynadakı müharibə və Qərbin sanksiyaları ilə bağlı ciddi problemlərlə üzləşə bilər.
ISW-nin son hesabatına görə, Kremlin iqtisadi siyasəti göstərir ki, Rusiya iqtisadiyyatı 2025-ci ildə əhəmiyyətli çətinliklərlə üzləşə bilər və Vladimir Putin uzunmüddətli perspektivdə Rusiyanın iqtisadi sabitliyindən narahatdır. Kreml bu yaxınlarda yaralı rus hərbçilərinin müalicəsi, inflyasiya ilə mübarizə, aşağı doğum səviyyəsi və işçi çatışmazlığı kimi uzunmüddətli demoqrafik problemlərin həlli üçün dövlət xərclərini azaltmağa yönəlmiş bir sıra tədbirlər görüb.
Bu siyasət göstərir ki, Rusiya iqtisadiyyatı Qərbin sanksiyalarına, pul məhdudiyyətlərinə və hərbi xərclərə Rusiya hakimiyyətinin göstərməyə çalışdığı qədər dözümlü deyil: “Bu siyasət həm də onu göstərir ki, Kreml Rusiya cəmiyyətini iqtisadi çağırışlardan qoruyaraq, müharibəni illər və ya onilliklər ərzində davam etdirə bilməyəcək. Ukraynanın döyüş meydanında müqavimətinə davamlı Qərb və beynəlxalq dəstək Rusiyanın iqtisadi problemlərini daha da kəskinləşdirəcək”.
Qeyd olunur ki, Putin Ukraynada döyüşlər zamanı yaralanan rus hərbçilərinə vəd edilən təzminatı azaldıb. Bu, Kremlin müharibənin artan qısa və uzunmüddətli xərclərini azaltmağa, Rusiya iqtisadiyyatında tarazlığı bərpa etməyə çalışdığının bariz göstəricisidir.
Noyabrın 13-də Putin ödəmələri kəskin azaldaraq, yalnız döyüşdə ağır yaralanan hərbi qulluqçulara üç milyon rubl birdəfəlik ödəmələri nəzərdə tutan fərman imzalayıb. Nisbətən yüngül yaralı hərbi qulluqçulara bir milyon rubl, daha yüngül yaralanmış hərbi qulluqçulara isə cəmi 100 min rubl ödəniş müəyyən edib.
Bu fərman Rusiyanın ultramillətçi icmasının ciddi reaksiyasına səbəb olub. ISW yazır: “Maliyyə həvəsləndirmələri Rusiya ordusunun son üç il ərzində hərbi xidmətə çağırış kampaniyası və şəxsi heyətin saxlanması səylərinin əsas elementinə çevrilib və bu cür təşviqlərin aradan qaldırılması sistemin Kreml üçün iqtisadi cəhətdən yararsız hala düşdüyünü göstərir.
Belə bir pul siyasəti ilə Rusiya müdafiə sənayesi çətin ki, Rusiya silahlarının itkilərini əvəz etmək üçün lazım olan istehsal səviyyəsinə çata bilsin”./azpolitika.info
