Rusiyanın Yekaterinburq şəhərində işgəncələrə məruz qalan və sonra həbs edilənlərdən biri, Biləsuvar rayonunun Zəhmətabad kənd sakini Əziz Azay oğlu Abbasovun vəziyyəti ağırdır.
Stopnarkotik.az xəbər verir ki, bunu Oxu.Az-a onun qardaşı Fitətxan Abbasov deyib.
Onun dediklərinə görə, hadisə zamanı təkcə qardaşına deyil, onun oğlu və həyat yoldaşna da amansız şəkildə xəsarətlər yetiriblər:
"OMON qardaşımın evinə basqın edib. Onu evin içində elə döyüb, yaman günə qoyublar. Hətta qardaşımın yanında onun oğlu və yoldaşını da döyüblər. Sonra qardaşımı və oğlunu elə o vəziyyətdə də polis idarəsinə aparıblar. Hazırda Əzizin vəziyyəti ağırdır".
Xatırladaq ki ki, iyunun 27-də səhər saatlarında Rusiya Federal Təhlükəsizlik Xidməti Yekaterinburq şəhərində azərbaycanlıların yaşadığı evlərə basqın edib. Basqın zamanı 2 azərbaycanlı öldürülüb, bir neçə nəfər saxlanılıb. Öldürülən azərbaycanlılar tanınmış jurnalist Seyfəddin Hüseynlinin qardaşlarıdır.
Azərbaycan Xarici İşlər Nazirliyi də iyunun 28-də Yekaterinburq şəhərində Rusiyanın FTX-nin azərbaycanlılara hücumları ilə bağlı bəyanat yayıb.
Bundan başqa, Rusiyanın müvəqqəti işlər vəkili Yekaterinburqdakı hadisəyə görə Azərbaycan XİN-ə çağırılıb, kəskin etiraz bildirilib.