TƏBİB Tovuzda zəhərlənən məktəblilərin son durumunu açıqlayıb.
Qurumdan bildirilib ki, Respublika Təcili və Təxirəsalınmaz Tibbi Yardım Mərkəzinə 11.04.2025-cü il tarixində saat 09:40 radələrində Tovuz rayonunun Düz Cırdaxan kənd orta məktəbində tüstüdən zəhərlənmə şübhəsilə çağırış daxil olub.
"Çağırış ünvanına təcili tibbi yardım briqadaları cəlb olunub. 5 nəfər ( məktəbli) Tovuz Rayonu Mərkəzi Xəstəxanasının Təcili yadım şöbəsinə hospitalizasiya olunub. Onlara dəqiqləşməmiş tüstü zəhərlənməsi diaqnozu təyin edilib.
Onların hər birinə zəruri tibbi xidmətlər göstərilib. Hazırda vəziyyətləri qənaətbəxş qiymətləndirilir"- TƏBİB-dən vurğulanıb.
***11:16
Qazax-Tovuz Regional Təhsil İdarəsi Tovuzda məktəblilərin zəhərlənməsi ilə bağlı məlumat yayıb.
İdarədən bildirilib ki, aprelin 11-də Tovuz rayonu Rafael İsmayılov adına Düz Cırdaxan kənd tam orta ümumtəhsil məktəbinin 7-ci sinfində təhsil alan 18 şagirddən 5-nin halı 2-ci dərs başlayan zaman pisləşib.
Məktəbə təcili tibbi yardım çağırılıb və şagirdlər xəstəxanaya aparılıb. Onların səhhəti regional təhsil idarəsi və məktəb rəhbərliyi tərəfindən diqqət mərkəzində saxlanılır. Hazırda aidiyyəti qurum tərəfindən hadisənin başvermə səbəbləri araşdırılır.
***10:55
Tovuzda məktəblilərin zəhərlənməsinin bəzi təfərrüatları məlum olub.
Stopnarkotik.az "unikal"a istinadən xəbər verir ki, məktəbli sinif otağındakı sobaya yıxılıb. Nəticədə sinifə tüstü dolub. Bu zaman məktəbin şagirdləri 2011-ci il təvəllüdlü S.Eyyubova, 2012-ci il təvəllüdlü A.Məmmədəliyeva, 2011-ci il təvəllüldü M.Həsənova, 2012-ci il təvəllüdlü B.Ələkbərzadə və 2012-ci il təvəllüdlü L.Quliyeva zəhərləniblər.
***10:30
Tovuz rayonunda məktəblilər dəm qazından zəhərlənib.
Stopnarkotik.az “qafqazinfo”ya istinadən xəbər verir ki, hadisə rayonun Düz Cırdaxan kənd orta məktəbində baş verib.
Məktəbin 5 şagirdi zəhərlənmə diaqnozu ilə xəstəxanaya yerləşdirilib.
Hadisə ilə bağlı araşdırma aparılır.