Siyəzən rayonunun Böyük Həmyə kəndi ərazisində mişar daşı daşıyan yük avtomobilləri aşıb.
Stopnarkotik.az oxu.az-a istinadən xəbər verir ki, bununla bağlı videogörüntü sosial şəbəkədə yayımlanıb.
Hadisə ilə bağlı Baş Dövlət Yol Polisi İdarəsinə (BDYPİ) sorğu ünvanladıq.
İdarənin İctimai qurumlarla əlaqə şöbəsinin xüsusilə mühüm tapşırıqlar üzrə baş inspektoru, polis polkovnik-leytenantı Mübariz Ağayev bildirib ki, hadisə nəticəsində sürücülərdən biri yüngül xəsarət alıb.
"Hadisə ötən gün saat 20:00-da Bakı-Quba avtomobil yolunun 105-ci kilometrliyində baş verib. Belə ki, Sədyar Dadaşovun idarə etdiyi "Mersedes" markalı yük avtomobili onunla eyni istiqamətdə hərəkətdə olan İsmayıl Səməndərovun idarə etdiyi "KamAZ" markalı avtomobillə toqquşub.
Qəza nəticəsində hər iki yük avtomobili yoldan çıxaraq aşıb.
Sürücülərdən İsmayıl Səməndərov yüngül xəsarət alıb. Əraziyə yol patrul xidmətinin əməkdaşları cəlb ediliblər. Hazırda faktla bağlı araşdırma aparılır", - deyə M.Ağayev qeyd edib.