"Türk Eskobar" kimi tanınan narkotik ticarətçisi Urfi Çetinkaya saxlanıldığı həbsxanada ölüb.
Bu barədə Türkiyə mətbuatı məlumat yayıb.
Xatırladaq ki, 2024-cü il fevralın 20-də İstanbul, İzmir, Afyonkarahisar, Malatya, Antalya, Çanaqqala, Biləcik, Muğla və Balıkesirdə Çetinkayanın rəhbəri olduğu mütəşəkkil cinayətkar qrupa qarşı keçirilən "Qəfəs-44" əməliyyatında 43 şübhəli saxlanılmışdı.
Almaniya, Bolqarıstan, İspaniya, Mavritaniya, Portuqaliya və Yunanıstanda 13 ton və Türkiyədə ələ keçirilən 24 ton, ümumilikdə 37 ton narkotikdən məsul olduqları müəyyən edilən şübhəlilər tanışları vasitəsilə özlərinə məxsus gəmi, ticarət konteyneri və balıqçı qayıqları ilə beynəlxalq narkotik daşımaları həyata keçiriblər.
İstintaq çərçivəsində cinayət təşkilatına aid 147 torpaq sahəsi, 56 yaşayış yeri, 8 yaşayış binası, 74 iş yeri, 53 dəbdəbəli nəqliyyat vasitəsi, qayıq, 53 şirkətdə ortaqlıq payları, 64 bank hesabı, 7 seyf və çox sayda qızıl-zinət əşyası, böyük məbləğdə nağd pullar aşkar edilib.
"Narkotik vasitələrin istehsalı və daşınması" ittihamı ilə 24 il həbs cəzası alan və qırmızı bülletenlə axtarışda olduğu halda, İstanbulda ələ keçirilən Urfi Çetinkaya isə 12 aprel 2023-cü ildə həbs edilmişdi.
