Müasir cəmiyyətin inkişafı, sosial rifahın möhkəmlənməsi və sağlam nəsillərin formalaşması birbaşa gənclərin düzgün həyat tərzi seçməsindən asılıdır. Gənclərin harada yaşamasından, hansı sosial şəraitdə böyüməsindən və hansı mühitdə fəaliyyət göstərməsindən asılı olmayaraq, narkotikdən uzaq olmaları həyati əhəmiyyət kəsb edir. Çünki narkotik maddələr heç bir problemin həlli deyil, əksinə, problemlərin başlanğıcıdır.
Bəzən gənclər çətinliklərlə qarşılaşdıqda, psixoloji gərginlik yaşadıqda və ya yanlış sosial təsirlərə məruz qaldıqda, problemlərdən “qaçış” üçün zərərli maddələrə üz tuta bilirlər. Lakin unudulmamalıdır ki, narkotik:
• Heç bir problemi həll etmir;
• İnsanı daha da dərin psixoloji və sosial uçuruma aparır;
• Qısa müddətli təsirinə baxmayaraq, uzun müddətə ağır nəticələr yaradır;
• Gəncin həyat planlarını, gələcəyini və sağlamlığını məhv edir.
Narkotikdən istifadə edən şəxsin həyatında nəinki çətinliklər azalır, əksinə, yeni və daha ağır fəsadlar yaranır. İnsan sağlamlığını itirir, ailə ilə əlaqələr zədələnir, təhsil və karyera məqsədləri puça çıxır.
Gənclər cəmiyyətin ən aktiv və inkişaf potensialı yüksək olan hissəsidir. Onların sağlam olması, düzgün seçimlər etməsi, psixoloji və sosial baxımdan güclü yetişməsi dövlətin və cəmiyyətin gələcəyi üçün əsas şərtlərdəndir. Bu baxımdan narkotikdən uzaq olmaq təkcə şəxsi seçim deyil, həm də sosial məsuliyyətdir.
Hər bir gənc bilməlidir ki:
• Narkotik təhlükədən başqa heç nə gətirmir;
• Hər bir çətinlik sağlam yollarla həll oluna bilər;
• Problemlərin həlli üçün ailədən, dostlardan, psixoloqlardan və ictimai təşkilatlardan dəstək almaq daha doğru və sağlam yoldur;
• Narkotiklə mübarizədə öz mövqeyini sərgiləmək cəsarət və şüurluluq göstəricisidir.
Narkotikdən uzaq durmaq gənclərin gələcəyi üçün ən vacib addımlardan biridir. Harada yaşamasından, hansı şəraitdə böyüməsindən asılı olmayaraq, hər bir gənc bu təhlükədən özünü qorumağı bacarmalıdır. Çünki narkotik nə problemin həllidir, nə də çıxış yoludur. O, yalnız insanı daha böyük təhlükələrə aparır və həyatı fəlakətə sürükləyir.
Sağlam gələcək, güclü cəmiyyət və xoşbəxt həyat üçün gənclərin narkotikdən uzaq durması hər birimizin ən böyük məsuliyyətidir.
Büllur CAVADQIZI,
Psixoloq