Tibbi Ərazi Bölmələrini İdarəetmə Birliyi (TƏBİB) Gəncədə ölən 4 yaşlı uşaqla bağlı məlumat açıqlayıb.
Qurumdan “Qafqazinfo”nun sorğusuna cavab olaraq bildirilib ki, serebral iflic xəstəliyindən əziyyət çəkən 16.05.2019-cu il təvəllüdlü uşaq 14.12.2023-cü il tarixdə səhhətində yaranan problemlərlə bağlı valideynləri tərəfindən Şəmkir Rayon Mərkəzi Xəstəxanasının Yoluxucu xəstəliklər şöbəsinə müayinəyə gətirilib.
“Həkim müayinəsi zamanı xəstədə qızılca virusu aşkar edilib və stasionar müalicəyə ehtiyac olduğu bildirilib. Uşağın valideynləri stasionar müalicədən imtina ediblər.
Daha sonra uşaq valideynləri tərəfindən 14.12.2023-cü il tarixində saat 15:30 radələrində Gəncə Şəhər Birləşmiş Xəstəxanasının nəzdində olan Uşaq Xəstəxanasına gətirilərkən xəstəxanayaqədər ölüm qeydə alınıb”, - məlumatda qeyd edilib.
***09:27
Azərbaycanda qızılca xəstəliyinə yoluxan daha bir uşaq vəfat edib.
Stopnarkotik.az-ın məlumatına görə, 2019-cu il təvəllüdlü Şəmkir rayon sakini H. Allahyarovun vəziyyəti ağırlaşıb və o, Gəncə şəhərinə gətirilən zaman yolda ölüb.
Faktla bağlı Gəncə Şəhər Prokurorluğunda araşdırma aparılır.