Slovakiyanın Baş nazirini güllələməkdə şübhəli bilinən yazıçı Juraj Chintulanın oğlu açıqlama verib.
Stopnarkotik.az xarici mediaya istinadən xəbər verir ki, oğlu atasının niyyətindən xəbərsiz olduğunu bildirib:
“Atamın niyyəti, nə planlaşdırdığı və ya bunun niyə baş verdiyi barədə heç bir fikrim yoxdur".
Jurnalistlər ondan atasının Robert Fitsoya münasibətini soruşublar.
O bildirib ki, tək bildiyi şey atasının baş nazirə səs verməməsidir. Oğlu hadisənin şokunda olduğunu dilə gətirib.
Yerli media xəbər verir ki, poeziyası ilə tanınan 71 yaşlı yazıçı müxalifətdə olan “Tərəqqiçi Slovakiya” partiyasının tərəfdarıdır.
Lakin bu iddia partiyanın lideri tərəfindən kəskin şəkildə pislənib. “Biz onun hərəkatımızın üzvü olduğunu birmənalı şəkildə inkar edirik. Onunla partiyamız və ya üzvlərimiz arasında başqa heç bir əlaqə yoxdur. Biz onun iyrənc hərəkətini qətiyyətlə pisləyirik”, - deyə Slovakiyanın “Hospodarske Noviny” qəzetinə istinadən Mixal Simecka bildirib.
Yazıçı nə ilə tanınır?
Slovakiya mətbuatı yazır ki, o, 2010-cu ildə üç şeir toplusu və bir roman yazıb. 2015-ci ildən o, Slovak Yazıçılar Assosiasiyasının üzvüdür.
Gündəlik “Denník N” nəşrinə görə o, "Dúha" (Slovak dilində göy qurşağı) ədəbi klubunun həmtəsisçisidir və keçmişdə mühafizəçi işləyib.
2016-cı ildə yazıçı “Hnutie proti nasiliu” siyasi hərəkatının yaradılmasına başlayıb.
Bu, paradoksal olaraq slovak dilində "zorakılığa qarşı hərəkat" deməkdir. Daha sonra o, partiyasının rəsmi qeydiyyatı üçün imza və maliyyə dəstəyi almaq üçün petisiyaya başlayıb.
“Zorakılıq çox vaxt insanların reaksiyası, vəziyyətə sadə narazılığın ifadə formasıdır. Narazı olaq, amma zorakı olmayaq!” deyə o, həmin vaxt yazıb.
Avropada “militarizasiya, ekstremizm, neonasizm və anarxiya hər yerdə mövcuddur” deyə o, həmin vaxt yazılarında xüsusi qeyd edib.
“Sosial” adını daşıyan partiya nə edir?
Yazıçı mütəmadi olaraq bloqunda solçu siyasi köşə yazıları yazır:
Məsələn, bir yazısında qeyd edib:
“Axı, varlı deviantların 4%-nin bütün kütləni manipulyasiya etməsi mümkün deyil və onlar heç nə etmədən buna icazə verirlər. Bu fraksiya bütün kütlənin patogen dəyər sistemini təyin etməməlidir. Bu, əxlaqsızlıq və anormallıqdır! Deyirlər ki, vicdanlı adamlar siyasətə gəlmir”.
O, yazılarında mütəmadi olaraq Robert Fitso hökumətini hədəfə alırdı. “Dövlət, sosial adını daşıyan partiya buna qarşı nə edir? Heç nə! Dövlət dilənçiliyi qanunla həll etmir” deyə yazıb.
Burada yazıçı baş nazir Robert Fitsonun sədrlik etdiyi “SMER – sosial demokratiya” partiyasını nəzərdə tutur.