Məşhur Amerikalı reper və aktyor Snup Doq marixuanadan imtina edəcəyini bildirib.
Stopnarkotik.az xəbər verir ki, müğənni bu barədə dünən İnstaqram səhifəsində açıqlayıb. O, deyıb: “Ailəmlə çox düşünüb-daşındıqdan sonra marixuana çəkməyi atmaq qərarına gəldim. Zəhmət olmasa, indi mənim şəxsi həyatımın məxfiliyinə hörmət edin”.
İzləyicilər bu xəbərə görə ikiyə bölünüblər, onların bəziləri bu xəbərə inanmayıblar və zarafatla qarşılayıblar. Məşhur reggi müğənnisi Bob Marlinin oğlu Ro Marli, "Dayının artıq ocağı sönüb... bu mövsümün qrili söndürülüb", deyə Snup Doqun hərəkətinə iztehza ilə qarşılıq verib. Hip-hop sənətçisinin vədinin real olub-olmaması yaxud bu açıqlamanın onun “Leafs By Snoop” adlı çətənə şirkəti üçün marketinq kampaniyasının bir hissəsi olub-olmadığı hələlik aydın deyil.
"Bu, çox güman ki, onun öz elektron siqaret və ya yeməli narkotik tərkibli məhsullarını işə saldığı reklam kampaniyası olacaq" deyə bəziləri şərh ediblər. Snupun vətəni Kaliforniya ştatı marixuananı tibbi istifadə üçün qanuniləşdirən ilk ştat olub. Daha sonra 2012-ci ildə Kolorado və Vaşinqton ştatları istirahət məqsədilə tibbi çətənəni leqallaşdırdılar. Snup Doqun 2015-ci ildə Kolorado ştatının Denver şəhərində yaratdığı “Leafs By Snoop” şirkəti çətənə növlərinin, konsentratlarının, çiçəklərinin və çətənə tərkibli yeməli məhsulların istehsalında ixtisaslaşmışdır. Snup canlı ifaları zamanı səhnədə tez-tez marixuana çəkirdi. Bu onun reklam tryukudur.
Stopnarkotik.az