“Sərhədçi” idman kompleksində kikboksinq üzrə məşqçi olmuş Nurani Qalabəylinin qətlində təqsirləndirilən həyat yoldaşı Əfsanə Qalabəylinin cinayət işi üzrə məhkəmənin növbəti prosesi keçirilib.
Stopnarkotik.az report-a istinadən xəbər verir ki, Bakı Ağır Cinayətlər Məhkəməsinin hakimi Səyavuş Hacıyevin sədrliyi ilə keçirilən prosesdə təqsirləndirilən şəxs barəsində məhkəmə psixiatrik və məhkəmə psixoloji ekspertizaları üzrə yekun nəticəsi elan edilib.
Bildirilib ki, Ə.Qalabəylinin törətdiyi cinayət əməli ilə əlaqədar olaraq onun psixiatrik və psixoloji müayinəsinin stasionar şəraitdə davam etdirilməsi, stasionar məhkəmə psixiatrik ekspertiza şöbəsinə göndərilməsi zəruridir.
Məhkəmə təqsirləndirilən şəxsin stasionar şəklində müalicə edilməsi ilə bağlı qərar qəbul edib.
Proses qeyri-müəyyən günədək təxirə salınıb.
Qeyd edək ki, hadisə ötən ilin sentyabrında paytaxtın Xətai rayonu ərazisində qeydə alınıb.
Belə ki, 1987-ci il təvəllüdlü Ə.Qalabəyli şəxsi münasibətlər zəminində aralarında yaranan münaqişə zamanı həyat yoldaşı, 1974-cü il təvəllüdlü N.Qalabəylini yaşadığı mənzildə bıçaqla qətlə yetirməkdə şübhəli bilinir.
Ə.Qalabəyliyə qarşı Cinayət Məcəlləsinin 120.1-ci (qəsdən adam öldürmə) maddəsi ilə ittiham olunub.
Xatırladaq ki, N.Qalabəyli “Sərhədçi” idman kompleksində kikboksinq üzrə məşqçi işləyib.
