Avropaya kokain qaçaqmalçılığının miqyası böyüyür və onun nəhəng həcmdə tədarükü qlobal kokain istehsalında rekord artımı əks etdirir.
Stopnarkotik.az xəbər verir ki, bunu “Europol” əməkdaşı “DPA”ya bildirib. “Europol”un məlumatına görə, Aİ-də hər il 31 milyard avro dəyərində qanunsuz narkotik satılır. 11,6 milyard avro dövriyyəsi ilə kokain 12 milyard avroluq dövriyyəsi olan çətənədən sonra ikinci yerdədir.
“Europol” nümayəndəsinin sözlərinə görə, kokainin demək olar ki, 70%-i Belçikanın Antverpen və Hollandiyanın Rotterdam limanları vasitəsilə Avropaya daxil olur. Eyni zamanda, narkotik ticarəti edən kriminal dəstələr hökumətin nəzarətindən yayınmaq üçün getdikcə daha kiçik limanlarda özlərinə yer etməyə çalışırlar. Eyni zamanda, narkotik qaçaqmalçılığı ilə bağlı zorakılığın sürətlə artması müşahidə olunur.
Həmçinin, ayrı-ayrı paketlənmiş narkotik daşımaları da getdikcə genişlənir. İndiyə qədər 8 ton ağırlığında və 600 milyon avro dəyərində olan ən böyük kokain daşınması 2023-cü ildə Rotterdamda banan konteynerində aşkar edilib.
Stopnarkotik.az