Ali Məhkəmədə xuliqanlıq niyyəti ilə qəsdən sağlamlığa ağır zərər vurmada təqsirləndirilən R.Həşimovun barəsindəki qərardan verilən kassasiya şikayəti üzrə məhkəmə iclası başa çatıb.
Hakim Şahin Yusifovun sədrliyi ilə keçirilən prosesdə qərar elan edilib.
Qərara əsasən, şikayət təmin edilməyib.
İttihama görə, hadisə 20 oktyabr 2022-ci ildə paytaxtın Nizami rayonu ərazisində qeydə alınıb.
Belə ki, R.Həşimov "Azad həyat" reabilitasiya mərkəzinin rəhbərinə telefonuna səsli mesaj göndərərək həmin mərkəzdə müalicə aldığı zaman ona qarşı haqsızlıq edildiyini və buna aydınlıq gətirmək istədiyini deyib. Sonra o, həmin mərkəzin rəhbəri ilə görüşmək istədiyini qeyd edib. Bu məqsədlə həmin gün saat 22 radələrində onlar "Biz Bizə" restoranının qarşısında görüşüb. Görüşə mərkəz rəhbəri ilə birlikdə həmin qurumda təlimatçı işləyən zərərçəkmiş B.Nurəliyev də gəlib. Söhbət zamanı zərərçəkmiş təqsirləndirilən şəxsin üzünə baxaraq gülüb. R.Həşimov da bunu bəhanə edib üzərində olan cib bıçağı ilə B.Nurəliyevin qarnının sol yan-arxa səthinə qəsdən bir dəfə vuraraq ona xəsarət yetirib.
Hadisədən sonra R.Həşimov saxlanılaraq istintaqa cəlb edilib.
Bakı Ağır Cinayətlər Məhkəməsinin hökmü ilə o, 6 il müddətinə azadlıqdan məhrum edilib. Bakı Apellyasiya Məhkəməsi isə apellyasiya şikayətini təmin etməyib./pravda.az
