Qaxda Daxili İşlər Nazirliyinin Polis Akademiyasının və rayon polis şöbəsinin birgə təşkilatçılığı ilə məktəblilərlə görüş keçirilib. Rayonun 30 orta məktəbində keçirilən görüşlərdə məqsəd zərərli vərdişlərin fəsadları barədə şagirdləri məlumatlandırmaq və onları təhsilə təşviq etmək olub.
Daxili İşlər Nazirliyinin mətbuat xidmətinin Şəki regional qrupundan Stopnarkotik.az-a verilən məlumata görə, sağlam həyat tərzinin təbliği ilə bağlı çıxışlar edən polis əməkdaşları ali təhsil müəssisələrinə hazırlaşan və daxili işlər orqanlarında xidmət etmək həvəsində olan abituriyentlərə Polis Akademiyası barədə ətraflı məlumat veriblər. Akademiyaya kursant qəbulu qaydaları barədə məktəblilərin sualları cavablandırılıb, orada gənclərimizin hərtərəfli inkişafı üçün yaradılan müasir şəraitdən danışılıb.
Sonda Polis Akademiyasındakı tədris prosesinə və kursantların hazırlığına həsr edilmiş videoçarx nümayiş olunub.
Stopnarkotik.az