Polşada BƏƏ-dən gətirilmiş dekorativ kərpiclərlə yüklənmiş konteynerlərdə bazar dəyəri təxminən 52 milyon avro olan bir tondan çox heroin müsadirə edilib.
Stopnarkotik.az xəbər verir ki, müsadirə olunan heroinin çəkisi 1030 kq olub. Hadisə ilə əlaqədar üç Polşa vətəndaşı saxlanılıb.
Ölkənin DİN naziri Marçin Kirvinski mətbuat konfransında əməliyyatla bağlı bildirib ki, "Bu, 10 ildən çox müddətdə ən böyük narkotik əleyhinə əməliyyatdır". Kirvinski əlavə edib ki, təhlükəsizlik qüvvələri bu ilin ilk beş ayında 83 tondan çox narkotik müsadirə edib.
Polşalı nazir qeyd edib ki, bu məbləğ 2022-ci ildə müsadirə edilmiş ümumi məbləğdən dörd dəfə çoxdur. Kirvinski həmçinin bu il 49 narkotik laboratoriyası və 4 kannabis plantasiyasını aradan qaldırdıqlarını bildirib və əlavə edib ki, "Səmərəli işimiz sayəsində bu il narkotik və mütəşəkkil cinayətkarlığa qarşı mübarizədə həlledici il olacaq".
Mətbuat konfransında maliyyə naziri Andjey Domanski əməliyyatın təkcə Polşada deyil, həm də bütün Avropada ən böyük heroin müsadirələrindən biri olduğunu bildirib. Polşa qurumları ilə Britaniya hakimiyyəti arasında sıx əməkdaşlığın uğurunu vurğulayan Domanski, sərhəd keçidlərində istifadə edilən qabaqcıl rentgen skan sistemlərinin əhəmiyyətini də vurğulayıb. O, ötən il sərhəd keçidlərində səkkiz yeni skan sistemi quraşdırıldığını bildirib. Polşa hakimiyyəti izah etdi ki, bir tondan çox heroinin müsadirə edilməsi ilə nəticələnən əməliyyat mart ayının sonlarında Britaniya gömrük rəsmilərinin BƏƏ-dən şübhəli yüklə bağlı məlumatından sonra başlayıb.
Stopnarkotik.az