“Qarabağ” UEFA Çempionlar Liqasının pley-off mərhələsinə vəsiqə qazanıb. Ağdam təmsilçisinin bu mərhələdəki rəqibi Çempionlar Liqasının son qalibi "PSJ" və ya İngiltərənin “Nyukasl Yunayted” klubu olacaq.
Rəqib yanvarın 30-da Bakı vaxtı ilə saat 15:00-da keçiriləcək püşkatma mərasimində bəlli olacaq.
Maraqlıdır ki, potensial rəqiblərlə “Qarabağ” arasında heyət dəyərinə görə böyük fərq var. “Nyukasl Yunayted”in heyətinin ümumi dəyəri təxminən 711 milyon avro, PSJ-nin heyət dəyəri isə 1,2 milyard avro təşkil edir. Müqayisə üçün, “Qarabağ” FK-nın heyətinin bazar dəyəri cəmi 28,6 milyon avro civarındadır.
Qeyd edək ki, pley-off mərhələsinin ilk oyunları 17–18 fevralda, cavab görüşləri isə 24–25 fevral tarixlərində keçiriləcək.
