Şəki Ağır Cinayətlər Məhkəməsində qəsdən sağlamlığa ağır zərər vurmada və xuliqanlıqda təqsirləndirilən Nağı Fərəczadənin (adı, soyadı şərtidir) cinayət işi üzrə məhkəmə istintaqı başa çatıb.
Hakim Tural Əfəndizadənin sədrliyi ilə keçirilən prosesdə hökm oxunub.
Məhkəmənin hökmü o, 2 il 11 ay 28 gün müddətinə azadlıqdan məhrum edilib.
İttihama görə, hadisə 2023-cü ilin iyun ayında, səhər saat 09 radələrində Şəki rayonunun Kiçik Dəhnə kəndində yerləşən çayxananın qarşısında baş verib.
Belə ki, zərərçəkmiş Tahir Tahirov (adı, soyadı şərtidir) Nağı Fərəczadədən ona olan 41 000 manat məbləğində borcu qaytarmasını tələb edib. Lakin təqsirləndirilən şəxs ona borcu olmadığını bildirərək tələbi rədd edib.
Müəyyən edilib ki, tərəflər arasında borc məsələsinə görə əvvəllər də dəfələrlə mübahisələr yaşanıb və aralarında şəxsi ədavət yaranıb. Növbəti qarşıdurma zamanı Nağı qisas almaq məqsədilə zərərçəkmişə əvvəlcə başı ilə sifət nahiyəsindən zərbə vurub. Ardınca yumruq zərbəsi ilə onu yerə yıxıb və bədəninin müxtəlif nahiyələrinə çoxsaylı yumruq və təpik zərbələri endirib.
Şəxsi münasibətlər zəminində başlayan mübahisə sonradan ictimai qaydanın kobud şəkildə pozulması ilə müşayiət olunan xuliqanlıq hərəkətlərinə çevrilib. Təqsirləndirilən şəxs hadisənin baş verdiyi çayxananın qarşısında və ətrafdakı ictimai iaşə obyektlərində insanların olmasına, eləcə də yoldan keçən şəxslərin narahatlığına əhəmiyyət vermədən hərəkətlərini davam etdirib.
İstintaq orqanının qənaətinə görə, Nağının hərəkətləri ətrafda olan şəxslərdə qorxu və həyəcan yaradıb, ictimai asayişin pozulmasına, vətəndaşların hüquq və qanuni mənafelərinin təhlükə altına düşməsinə səbəb olub.
Məhkəmə-tibbi ekspertizasının rəyinə əsasən, zərərçəkmiş şəxsə C2 fəqərəsinin sağ yan qövsünün yerdəyişməmiş xətti sınığı, sağ ağciyərin orta payında pnevmotoraksla müşayiət olunan sıxılma kimi həyat üçün təhlükəli hesab edilən ağır xəsarətlər yetirilib.
Bundan başqa, Tahirdə ənsə-təpə nahiyəsinin dərialtı hematoması, yumşaq toxumalarının əzilməsi, yüngül beyin əzilməsi və digər kəllədaxili travmalar müəyyən edilib. Həmin xəsarətlər sağlamlığın qısa müddətə pozulmasına səbəb olan yüngül xəsarətlər kimi qiymətləndirilib.
Nağı bununla kifayətlənməyərək yüksək səslə zərərçəkmişin qulağını kəsəcəyini, onu məhv edəcəyini bildirərək hədələr səsləndirib, eyni zamanda nalayiq ifadələr işlədərək aqressiv davranışlarını davam etdirib.
Onun barəsində Cinayət Məcəlləsinin 126.1-ci (qəsdən sağlamlığa ağır zərər vurma) və 221.1-ci (xuliqanlıq) maddələri ilə ittiham irəli sürülüb.
Məhkəmə istintaqı zamanı Nağı Fərəczadə ibtidai istintaqda verdiyi ifadəni təsdiqləsə də, ona elan olunmuş ittiham üzrə özünü təqsirli bilməyib./pravda.az
