ABŞ Prezidenti Donald Tramp Vaşinqton səmasında baş verən təyyarə qəzasını şərh edib.
Stopnarkotik.az xəbər verir ki, D.Tramp baş vermiş insident haqqında özünün "Truth Social" sosial şəbəkə hesabında yazıb.
"Təyyarə hava limanına doğru ideal, normal trayektoriya ilə hərəkət edib. Helikopter isə uzun müddət birbaşa təyyarənin üzərinə doğru gedib. Gecə aydın olub, təyyarənin işıqları parlayıb, niyə helikopter yuxarı qalxmayıb, aşağı enməyib, yaxud geriyə manevr etməyib? Niyə dispetçer qülləsindən helikopter heyətinə xəbərdarlıq edilməyib? Bu, qarşısı alına biləcək, lakin tədbir görülməyən pis bir vəziyyətdir. Bu, pisdir!" - deyə D.Tramp yazıb.
Qeyd edək ki, “American Airlines” aviaşirkətinə məxsus, Uiçito-Vaşinqton reysini yerinə yetirən “Bombardier CRJ700” tipli sərnişin təyyarəsi Vaşinqtonun Ronald Reyqan aeroportuna eniş etmək istəyərək ABŞ Quru Qoşunlarının “Sikorsky H-60” (“Black Hawk”) hərbi helikopteri ilə toqquşub.
Toqquşma nəticəsində partlayış baş verib, hər iki nəqliyyat vasitəsi Potomak çayına düşüb.
Təyyarədə 60 sərnişin, 4 ekipaj üzvü, helikopterdə 3 hərbçi olub.
Qəza nəticəsində ölənlərin olduğu bildirilir. Artıq 18 nəfərin meyiti Potomak çayından çıxarılıb.
Qəzadan sağ qurtulanlar da var.
Axtarış-xilasetmə tədbirləri davam etdirilir.
Aeroportun fəaliyyəti dayandırılıb.
