Bakıda tanışını öldürməkdə təqsirləndirilən İmanverdi Quluzadə və Şahin Əhmədovun məhkəməsinin növbəti prosesi keçirilib.
Bakı Ağır Cinayətlər Məhkəməsinə hakim Leyla Əsgərova-Məmmədovanın sədrliyi ilə keçirilən prosesdə şahidlərin ifadəsi dinlənilib.
Cinayət işində şahid qismində dindirilən Mahir Ağayev bildirib ki, hadisə axşamı küçədən qışqırıq səsi gəlib və o, dərhal çölə çıxıb:
"Mən hadisə vaxtı qışqıran qadın səsi eşitdim. Bayıra çıxdım. Gördüm ki, öldürülən oğlan (Bəkir Qənbərov - red.) bizim qapını açıb həyətə daxil oldu. Təlaşlı idi. Sonra arxasınca o oğlan (İmanverdi Quluzadə - red.) zorla qapını açdı və daxil oldu. Əlindəki bıçaqla vəfat edən şəxsin kürəyindən vurdu. Sonra qaranlıqda gözdən itdi. Səsini eşitdiyim hicablı qadın isə bayırda dayanmışdı. Ondan soruşanda bildirdi ki, bıçaqlayan şəxs onun əridir. Ölən şəxslə də münasibəti varmış".
O, əlavə edib ki, qaranlıq olduğu və işıqlar söndüyü üçün hər iki şəxsi detallı görə bilməyib:
"Mən nə öldürülən şəxsin, nə də öldürənin üzərində münaqişə ilə bağlı izlər görə bilmədim. Çünki hava qaralmışdı və işıqlar da sönmüşdü. Sadəcə hadisənin necə baş verdiyini və ölən şəxsin yola çıxanda yıxıldığını gördüm. Daha sonra 102 xidmətinə zəng etdim".
Ölən şəxsin anası həmin hicablı qadının adının Səbinə olduğunu deyib. Bildirib ki, qucağında da körpəsi olub. Lakin, körpəni evdə qoyublar və daha sonra mübahisə başlayıb.
Təqsirləndirilən şəxs isə ifadədə yanlışlıqlar olduğunu bildirirək etiraz edib. O, iddia edib ki, birinci zərərçəkmiş şəxs onu vurub:
"Vəfat edən şəxs qoluma üç bıçaq zərbəsi vurdu. Mən də bıçaq çıxartdım və bildirdim ki, istədiyi budursa belə vuruşa bilərik. O, şahidin həyətinə qaçdı. Bu zaman şahid dedi ki, "balaca uşaq var, çıxın çölə". Mən də onu tutub çölə çıxarmağa çalışdım. Bu zaman hadisə baş verib".
Məhkəmə istintaqı yekunlaşıb.
Dövlət ittihamçısı Orxan Səmədov çıxış üçün vaxt istəyib. Bu səbəbə görə iclas 14 oktyabr tarixinədək təxirə salınıb.
Qeyd edək ki, hadisə paytaxtın Suraxanı rayonu, Bülbülə qəsəbəsindəki evlərdən birində baş verib. Belə ki, 1986-cı il təvəllüdlü Şahin Əhmədov, 1997-ci il təvəllüdlü İmanverdi Quluzadə və 1998-ci il təvəllüdlü Bəkir Qənbərov arasında mübahisə yaranıb. Mübahisə zamanı bıçaq xəsarətləri alan Bəkir Qənbərov ölüb. Ş.Əhmədov və İ.Quluzadəyə qarşı Cinayət Məcəlləsinin 120.2.4-cü maddəsi üzrə ittiham irəli sürülüb./bizim.media
Tanışını qətlə yetirən şəxsin ETİRAFI – “Əvvəlcə o məni bıçaqladı, sonra isə...”
