“La Familia Miçoakana” kartelinin liderləri olan Urtado Olaskoaqa qardaşları Meksika narkotik ticarətinin tanınmış personajlarındandır.
2016-cı ildə narkokarteldə hakimiyyət dəyişikliyi baş verəndən bəri onun yeni liderləri “El Fresa” ilə böyük qardaşı “El Peskado” oldular. Onlar Qerrero və Mexiko ştatlarının əsas bölgələrinə, həmçinin Miçoakanın şərq ərazilərinin bir hissəsinə nəzarət edirlər.
Stopnarkotik.az xəbər verir ki, qardaşlar Cənubi Amerikadan böyük miqdarda kokain daşınmasına nəzarət edirlər. Qerrero sahillərinə çox tonluq yüklər çatdıran yüksək sürətli qayıqlar narkotik daşınması üçün istifadə olunur. Bundan əlavə, kartel ölkənin ən böyük limanlarından biri olan Lasaro Kardenas limanından sərbəst istifadə edir və bu limanlar vasitəsilə sintetik narkotiklərin istehsalı üçün kimyəvi prekursorlar çatdırılır.
Onlar həmçinin böyük miqdarda metamfetamin və bəzi fentanilin istehsal edildiyi yeraltı laboratoriyalara nəzarət edirlər. Bu narkotiklər daha sonra Atlanta, Hyuston, Tulsa, Dallas və Çikaqoda olmaqla, sərhədyanı Nuevo Laredo və Reynosa şəhərləri vasitəsilə ABŞ-a keçirilir.
ABŞ-ın Narkotiklərlə Mübarizə İdarəsinin (DEA) məlumatına görə, qardaşlar və onların şərikləri hər il ABŞ-a təxminən 36 ton metamfetamin, 12 ton heroin və 12 ton kokain tədarük edir.
Qardaşların nəzarətində olan ərazilərdə 3 milyondan çox insan yaşayır və onların demək olar ki, hamısı sistematik soyğuna məruz qalır. Bununla belə, bəzən kartelin metodları sadə talançılıqdan çox-çox kənara çıxır.
Məsələn, tikinti şirkətləri bu narkokartellərə təkcə “bac” verməyə deyil, həm də “La Familia Miçoakana”ya bağlı olan inşaat malları satan şirkətlərdən material – beton, qum, alçıpan, metal tir və s. almağa məcburdurlar.
Sxem onilliklər ərzində öz təsir sahələrində oxşar üsullardan istifadə edən Siciliyalı Koza Nostranın taktikasını xatırladır. ABŞ hökuməti bu yaxınlarda "El Peskado"nun tutulması üçün informasiya verənə 5 milyon dollar, "El Fresa"nın tutulması üçün informasiya verənə isə 3 milyon dollar mükafat vəd edib.
Stopnarkotik.az
