Honduras narkotik qaçaqmalçılığı ilə mübarizə aparmaq üçün Ukraynadan dronlar alacaq. Müzakirələr ölkənin narkotik qaçaqmalçılığı və regionda ən yüksək həddə zorakılıqlarla mübarizə aparmağa davam etdiyi bir vaxta təsadüf edir.
Stopnarkotik.az xəbər verir ki, Honduras bu baxımdan narkotik qaçaqmalçılığı ilə mübarizə və sərhəd təhlükəsizliyini gücləndirmək səylərinin bir hissəsi olaraq Ukraynadan dronlar almağı planlaşdırır. Bu haqda bazar ertəsi günü prezident Nəsri Asfura bildirib.
Belə ki, Asfura ötən həftə Kiyevdə Ukrayna Prezidenti Volodimir Zelenski ilə görüşüb. Danışıqlar zamanı Zelenski hərbi texnologiya, xüsusən də dron sistemləri sahəsində əməkdaşlıq təklif edib.
Amerika Dövlətləri Təşkilatının Baş Assambleyası zamanı Panama şəhərində AFP agentliyinə müsahibə verən Asfura, texnologiyanın səlahiyyətlilərə ucqar əraziləri izləməyə və cinayətkarlığı hədəf almağa kömək edə biləcəyini söyləyib.
"Sərhədlərimizi səmərəli şəkildə qorumaq, yüksək texnologiyalı avadanlıqlarla mütəşəkkil cinayətkarlığa qarşı mübarizə aparmaq üçün dronlardan danışırıq", deyə o bildirib.
Asfura əlavə edib ki, Ukrayna "sərhədlərimizin təhlükəsizliyini daha da təmin etmək və narkotik qaçaqmalçılığı ilə mübarizə aparmaqda bizə çox kömək edə bilər" və məsələni "milli təhlükəsizlik məsələsi" kimi şərh edib.
Honduras uzun müddətdir ki, Cənubi Amerikadan şimala doğru hərəkət edən kokain daşınmaları üçün tranzit yolu kimi istifadə olunur və getdikcə yerli koka becərilməsi, kokain emalı əməliyyatları ilə bağlı problemlərlə üzləşir. Təhlükəsizlik qüvvələri ucqar bölgələrdə plantasiyalar və narkolaboratoriyalar aşkar edib ki, bu da ölkənin qaçaqmalçılıq dəhlizindən narkotik istehsalı zəncirinin daha aktiv hissəsinə çevrilməsi ilə bağlı narahatlıqlar yaradır.
Narkoticarət uzun müddətdir ki, şantaj, zorakılıq və əraziyə nəzarətlə bağlı olan “MS-13” və “Barrio 18” kimi güclü cinayətkar qruplarla yanaşı fəaliyyət göstərir. Hondurasda hər 100.000 əhaliyə təxminən 24 nəfər qətl hadisəsi qeydə alınıb ki, bu da qlobal orta göstəricidən təxminən dörd dəfə çoxdur.
Təkcə ötən ay narkotik marşrutları ilə bağlı mübahisələrdən təsirlənən bir icmada 19 nəfər öldürülüb, Qvatemala sərhədi yaxınlığında narkotik qaçaqmalçılarının törətdiyi hücumda isə beş polis əməkdaşı öldürülüb.
Təklif olunan dron alışı Hondurasın xarici tərəfdaşlarla təhlükəsizlik əməkdaşlığını gücləndirmək üçün daha geniş səylərinin bir hissəsidir. Ölkənin silahlı qüvvələri bu yaxınlarda ABŞ ilə mümkün cinayətkarlığa qarşı əməliyyatları müzakirə etdiklərini bildirib, Asfura isə Ukrayna dronlarının kənd təsərrüfatı kimi mülki məqsədlər üçün də istifadə edilə biləcəyini qeyd edib.
Stopnarkotik.az