Yenidən cinayət məsuliyyətinə cəlb edilən “Quska” ləqəbli sabiq deputat Hüseyn Abdullayevin cinayət işi üzrə ibtidai istintaq başa çatıb.
Stopnarkotik.az “qafqazinfo”ya istinadən xəbər verir ki, hazırda tərəflər iş materialları ilə tanış olurlar.
“Quska”ya qarşı yekun olaraq Cinayət Məcəlləsinin 193-1.3.2-ci ( cinayət yolu ilə əldə edilmiş pul vəsaitlərini leqallaşdırma) maddəsi ilə ittiham elan edilib. O, 6 milyon manat vəsaitin qanunsuz leqallaşdırılmasında təqsirləndirilir. Bu maddənin sanksiyasında 7 ildən 12 ilə kimi azadlıqdan məhrum etmə cəzası nəzərdə tutulur.
Yaxın günlərdə toplanmış materiallar baxılması üçün Bakı Ağır Cinayətlər Məhkəməsinə göndəriləcək.
Qeyd edək ki, H.Abdullayev 2018-ci ildə 6 il müddətinə azadlıqdan məhrum edilmişdi. Həmin müddət bu yaxınlarda başa çatıb. Lakin yeni cinayət işinə görə o, azadlığa çıxa bilməyib.