Bəzi media və sosial şəbəkə səhifələrində Xətai rayonu, Ceyhun Həsənov, 81 ünvanında prokurorluq əməkdaşları üçün inşa olunmuş çoxmərtəbəli binanın infrastrukturu və saxlanması ilə bağlı müxtəlif problemlərin mövcudluğu barədə məlumatlar yayılıb.
Bu barədə Baş Prokurorluğun mətbuat xidmətindən bildirilib.
“Qeyd olunan bina prokurorluq işçilərinin mənzil şəraitinin yaxşılaşdırılması məqsədilə "Qayğı" Mənzil Tikinti Kooperativinin (MTK) sifarişi əsasında podratçı tərəfindən inşa edilib və hazırda binanın saxlanması, kommunal və digər xidmətlər həmin MTK tərəfindən həyata keçirilir. MTK-nın prokurorluq orqanları ilə hər hansı bağlılığı yoxdur” – deyə məlumatda qeyd olunub.
***13:36
Bakının Xətai rayonunda prokurorluq işçiləri üçün inşa edilmiş çoxmərtəbəli binada təhlükəli vəziyyət yaranıb.
Bina sakini olan Pərviz Əzimov yaranmış təhlükəli vəziyyətlə bağlı sosial şəbəkələrdə görüntülər paylaşıb.
O bildirilib ki, 2022-ci ildən Xətai rayonu, Ceyhun Həsənov, 81 ünvanındakı binaya köçdükdən sonra müxtəlif problemlərlə üzləşiblər: “Bina Baş Prokurorluq tərəfindən işçiləri üçün tikilib. Həmin işçilər də evi satıb, almışıq. Binada problemlər dəhşətli həddədir. Zirzəmidə daimi qrunt suları var, divarlar artıq erroziyaya uğramağa başlayıb, parklanma sahəsinə girirsən, biabırçılıqdır. Divarlar nəmişlik içindədir. Hər yer zibil tullantısı ilə doludur. Sahibsiz və ya hələ təmir olunmamış evlərin pəncərələri sökülüb yerə düşür. Hər küləkdə böyük parça şüşə düşür. Avtomobillərin üstünə düşməyi də olub. Şükür ki, hələ insan üstünə düşməyib”.
Qeyd edilib ki, problemlərlə bağlı Baş Prokurorluq, Fövqəladə Hallar Nazirliyi, Xətai Rayon İcra Hakimiyyəti və bir neçə başqa quruma dəfələrlə məktubla müraciət edilsə də, nəticəsi olmayıb.
Məsələ ilə bağlı FHN-nin Mətbuat xidmətindən bildirilib ki, problemdən xəbərdardırlar: “Bu məsələ ilə bağlı araşdırma aparılır. Səlahiyyətlərimiz çərçivəsində tədbir görüləcək və ictimaiyyətə məlumat veriləcək".
Binanın tikintisini həyata keçirən və hazırda binaya nəzarət ediən "Qayğı" MTK-nın rəhbəri Mircavan Kazımovla əlaqə saxlamağa çalışsaq da, zənglərimizə cavab vermədi./"qafqazinfo"
