Ali Məhkəmədə hədə-qorxu ilə tələb etmə və adam oğurluğunda təqsirləndirilən Məmməd Xanlarov, Sakit Salamzadə, Akif Hidayətov, Hətəm Məmmədov və Əşrəf Tağızadənin (hər birinin adı, soyadı şərtidir) barəsindəki qərardan dövlət ittihamçısı tərəfindən verilən kassasiya protesti və kassasiya şikayəti üzrə məhkəmə iclası başa çatıb.
Hakim Teyyub Muxtarovun sədrliyi ilə keçirilən prosesdə qərar elan olunub.
Qərara əsasən, protest və şikayət təmin edilməyib.
İttihama görə, hadisə 2022-ci il iyulun 13-də Kürdəmir şəhərində baş verib. Cinayət qrupunun üzvləri - Məmməd Xanlarov, Sakit Salamzadə, Akif Hidayətov, Hətəm Məmmədov və Əşrəf Tağızadə zərərçəkmiş Mahal Mahalovu (adı, soyadı şərtidir) çayxanada söhbət edəcəkləri bəhanəsi ilə axşam saat 22 radələrində "Kolxoz" bazarının qarşısına çağırıb avtomobilə mindiriblər.
Zərərçəkmiş şəxs başqa yerə aparılacağını anlayıb qaçmağa cəhd etdikdə isə cinayətkar qrup tərəfindən saxlanılaraq deşici alət onun bel nahiyəsinə dirədilib avtomobilə məcburi mindirilib. Sonra Mahal Kürdəmir rayonunun Qocalı kəndinə aparılıb.
Cinayət qrupunun məqsədi 2022-ci il iyulun 5-də Bakı-Qazax-Gürcüstan avtomobil yolunda baş vermiş yol-nəqliyyat hadisəsi ilə bağlı olub. Həmin hadisədə zərərçəkmiş şəxsin qardaşının idarə etdiyi avtomobil cinayət qrupunun üzvlərindən birinin maşınına ziyan vurmuşdu. Təqsirləndirilən şəxslər isə bu ziyanın ödənilməsini bəhanə edərək Mahalı oğurlayıblar.
Zərərçəkmiş şəxs saxlanıldığı yerdə döyülərək ona sağ gözün iç bucaq hissəsinin qançırı, sağ bilək nahiyəsinin hiperemiyası və üç ədəd kiçik ölçülü sıyrıq kimi xəsarətlər yetirilib. Bundan sonra cinayət qrupu video çəkiliş aparaq Mahaldan 10 avqust 2022-ci il tarixə qədər 12 500 manat ödəməsini, əks halda üzərindəki rüsvayedici videogörüntülərin yayılacağı ilə hədələyiblər. Hədə-qorxunun ardından zərərçəkmiş şəxs sərbəst buraxılıb.
Hadisədən sonra həmin şəxslərin saxlanılaraq cinayət məsuliyyətinə cəlb edilib.
Lənkəran Ağır Cinayətlər Məhkəməsinin hökmü ilə Məmməd Xanlarov, Sakit Salamzadənin hər biri 8 il 2 ay müddətinə azadlıqdan məhrum edilib. Akif Hidayətov, Hətəm Məmmədov və Əşrəf Tağızadənin hər biri isə 5 il müddətinə azadlığın məhdudlaşdırılması cəzasına məhkum olunub. Həmin hökmdən dövlət ittihamçısı apellyasiya protesti və təqsirləndirilən şəxslər isə apellyasiya şikayətləri veriblər. Şirvan Apellyasiya Məhkəməsinin qərarı ilə Məmməd Xanlarovla Sakit Salamzadənin cəzaları 6 il 2 aya endirilib. Akif Hidayətov 6 il 3 ay 18 gün müddətinə azadlıqdan məhrum edilib və məhkəmə zalında həbs olunub./pravda.az
