2026-cı il Dünya Kubokunun finalında İspaniyaya uduzduqdan sonra Argentina millisinin kapitanı Lionel Messi və daha 9 futbolçu nümayəndə heyəti ilə birlikdə Vətənə qayıtmayıb.
Stopnarkotik.az xəbər verir ki, bu barədə "TyC Sports" nəşri məlumat yayıb.
Nəşrin məlumatına görə, Argentina millisini aparan təyyarə final matçından cəmi bir neçə saat sonra Nyu-Yorkdan Buenos-Ayresə uçub. Paytaxta ümumilikdə 16 futbolçu qayıdıb.
ABŞ-nin "İnter Mayami" klubunda çıxış edən Messi komanda yoldaşı Rodriqo De Paul kimi ABŞ-də qalıb. Onlarla yanaşı Enso Fernandes, Lautaro Martines, Xulian Alvares, Xeronimo Rulyi, Nikolas Pas, Kristian Romero, Nauel Molina və Xuan Musso da Argentina nümayəndə heyəti ilə Buenos-Ayresə uçmayıblar.
Argentina Futbol Assosiasiyası (AFA) bildirib ki, ABŞ-də qalan futbolçular "öz klublarına qayıtmaq və ya istirahət dövrünə başlamaq üçün" fərqli istiqamətlərə yola düşüblər.
Qeyd edək ki, Argentina yığması 2026-cı il Dünya Çempionatının finalında əlavə vaxtda İspaniyaya 0:1 hesabı ilə məğlub olaraq dünya çempionu titulunu qoruya bilməyib.
Xatırladaq ki, argentinalılar üçqat dünya çempionudurlar: onlar 1978-ci ildə Niderlandı, 1986-cı ildə Almaniya Federativ Respublikasını (AFR) və 2022-ci ildə Fransanı məğlub edərək titula sahib çıxıblar. Bundan əlavə, Argentina dörd dəfə Dünya Çempionatının gümüş mükafatçısı olub.