Nərimanov Rayon Məhkəməsində dələduzluqda təqsirləndirilən Qamət İmanovun (soyadı şərtidir) cinayət işi üzrə məhkəmə istintaqı yekunlaşıb.
Stopnarkotik.az pravda.az-a istinadən xəbər verir ki, hakim Gültəkin Əsədovanın sədrliyi ilə keçirilən prosesdə hökm oxunub.
Məhkəmənin hökmü ilə o, cinayət məsuliyyətindən azad edilib və iş üzrə icraata xitam verilib. Təqsirləndirilən şəxs barəsində seçilmiş həbs qətimkan tədbiri ləğv edilib və Qamət İmanov məhkəmə iclas zalında dərhal həbsdən azad olunub.
İttihama görə, təqsirləndirilən şəxs özgə əmlakını ələ keçirmək məqsədi ilə dələduzluq əməli törədib.
Belə ki, Qamət İmanov digər şəxs vasitəsilə tanış olduğu zərərçəkmiş S.S.-ə (adı, soyadı şərtidir) Təhsil Nazirliyi tərəfindən işlədiyi “Caspian” təhsil mərkəzinə texniki təhsil istiqaməti üzrə lisenziya alınmasına köməklik göstərə biləcəyini vəd edib.
O, bu vədlə zərərçəkmiş şəxsin etibarını qazanaraq onu aldadıb və pul vəsaitlərini mərhələli şəkildə ələ keçirib. Qamət İmanov 07 may 2022-ci il tarixdə ofisdə S.S.-dən 2000 manat, 11 may 2022-ci il tarixdə isə Nərimanov rayonu, Ziya Bünyadov prospekti 20/19 ünvanında yerləşən “SOCAR” yanacaqdoldurma məntəqəsinin qarşısında əlavə olaraq 1000 manat pul alıb.
Beləliklə, vahid niyyətlə hərəkət edən təqsirləndirilən şəxs ümumilikdə 3 000 manat məbləğində pul vəsaitini ələ keçirərək zərərçəkmiş şəxsə maddi ziyan vurub.
Toplanmış sübutlar əsasında onun əməli Cinayət Məcəlləsinin 178.1-ci maddəsi, yəni dələduzluq kimi tövsif edilib.
Məhkəmə iclasında Qamət İmanov ona qarşı irəli sürülmüş ittiham üzrə özünü təqsirli bilərək ifadəsində törətdiyi əməli etiraf edib.
Zərərçəkmiş ifadəsində Qamət özünü ona Təhsil Nazirliyinin məsul əməkdaşı kimi təqdim etdiyini bildirib.
