"CBS News" telekanalının İran təyyarələrinin təhlükəsizlik məqsədilə Pakistan ərazisində yerləşdirilməsinə dair yaydığı məlumat əsassız və uydurmadır".
Bu barədə Pakistanın Xarici İşlər Nazirliyinin (XİN) yaydığı rəsmi bəyanat bildirilib.
"Belə fərziyyələrə əsaslanan iddialar regionda sülh və sabitliyin bərqərar olunması istiqamətindəki fəaliyyətlərə xələl gətirmək məqsədi daşıyır", - deyə nazirliyin sosial şəbəkə hesablarında edilən paylaşımda qeyd olunub.
Xarici siyasət idarəsi aydınlaşdırıb ki, atəşkəs təmin olunduqdan sonra və İslamabadda baş tutan ABŞ-İran müzakirələrinin ilkin mərhələsində hər iki dövlətə məxsus bir neçə təyyarə diplomatların, təhlükəsizlik qruplarının və inzibati işçilərin daşınması üçün Pakistana eniş edib. Bununla yanaşı, bəzi uçuş aparatları və xidməti personal danışıqların növbəti mərhələlərini gözləmək məqsədilə müvəqqəti olaraq ölkə ərazisində saxlanılıb.
Bəyanatda vurğulanır ki, hazırda Pakistan ərazisində olan İran təyyarələri məhz atəşkəs zamanı gətirilib və onların hər hansı hərbi razılaşmalar və ya təhlükəsizlik paktları ilə heç bir bağlılığı yoxdur. Pakistan XİN əlavə edib ki, "bununla bağlı irəli sürülən əks iddialar yalnız fərziyyədir, yanlışdır və mövcud reallıqdan tamamilə uzaqdır".
Qurumun məlumatında o da bildirilib ki, "Pakistan vəziyyətin yumşaldılması və dialoqun dəstəklənməsi prosesində daim obyektiv, konstruktiv və məsuliyyətli vasitəçi kimi iştirak edib. Öz missiyasına sadiq qalaraq, ölkə bütün tərəflərlə daimi əlaqəni və tam şəffaflığı təmin etməklə yanaşı, tələb olunan logistik və inzibati yardımı da göstərib."
İranın ABŞ-nin mümkün zərbələrindən mühafizə olunmaq məqsədilə özünə məxsus hərbi və mülki aviasiya vasitələrini Pakistan və Əfqanıstana yerləşdirdiyi güman edilir.
Bu barədə "CBS News" telekanalı xəbər yayıb.
Telekanalın məlumatına əsasən, İranın hərbi təyyarələri İslamabadın cənub istiqamətində yerləşən Nur Xan adlı Pakistan Hərbi Hava Qüvvələrinə məxsus bazaya aparılıb. Mənbələr həmçinin kəşfiyyat uçuşları üçün xüsusi olaraq modifikasiya edilmiş İranın RC-130 aparatının da həmin hərbi bazaya göndərildiyini vurğulayıblar.
Bildirilir ki, hərbi toqquşmalar başlamazdan az öncə İrana məxsus "Mahan Air" aviaşirkəti bir neçə təyyarəsini Kabil şəhərinə istiqamətləndirib və İslam Respublikasının hava sərhədləri bağlandıqdan sonra həmin hava gəmiləri orada saxlanılıb. Ancaq Pakistanla Əfqanıstan arasında baş verən silahlı insidentlər səbəbindən təyyarələr qısa müddət sonra Əfqanıstanın İran sərhədində yerləşən Herat hava limanına gətirilib.
Buna baxmayaraq, "Taliban" hərəkatının rəsmi nümayəndəsi Zəbihullah Mücahid "CBS News" telekanalına verdiyi açıqlamada yayılan bu iddiaları inkar edib./oxu.az
